5 сентябрьыште М.Шкетан лӱмеш Марий драме театр у тургымым у спектакль дене почо. Тиде Александр Арзайнын «Микулан – презе, Якулан – ӱдыр» пьесыж почеш шындыме тыгаяк лӱман спектакль ыле. Зал тич шыҥ-шыҥ погынышо калык тудым моткоч шокшын вашлийын.
Тургымым почмаш кугу пайрем семынак эртыш. Спектакль тӱҥалме деч ончыч воштончышан залыште эрвел марий-влак оза лийыныт. Эн ончычак марий калыклан сайын палыме мурызо Елизавета Андреева Сергей Пчелкинын шоктымыж почеш эрвел марий такмак-влакым сылне йӱкшӧ дене йоҥгалтарыш. Тудым «Эрвел марий» калык ансамбль вашталтыш. Самодеятельный артист-влакын муро-куштымашкышт ончаш толшо-влакат чолган ушнышт.
Антракт жапыште эрвел марий кидмастмар Надежда Акиева шкенжын тӱрлеман тувыржо-влакым калыклан ончыктыш.
«Микулан – презе, Якулан – ӱдыр» пьесе – Александр Зайнутдиновын (Арзайнын) икымше пьесыже. Тудо шке жапыштыже эн сай пьесе конкурсышто сеҥыше-влак радамыш логалын ыле. Сценыш лекшаш жапым икмыняр ий вучен. Тудын дене пашам ышташ Роман Алексеев кумылаҥын. Тудым произведенийын чылт эрвел марий шӱлышан да кумылан улмыжо сымыстарен. Содержанийым келгемдаш режиссер муро-влакым моштен кучылтын. Тыге спектакль пошкырт кундемысе марий-влакын пайрем йӱла ойыртемыштым, муро поянлыкыштым почын пуа. Сем дене сӧрастарыме, чием шотышто кугу полышым режиссерын полышкалышыже, пошкырт марий ӱдыр Оксана Асмаева ден тудын аваже Елизавета Андреева пуэныт.
Тичмаш налмаште, сценыш муро-куштымашан, йӧратымаш темылан пӧлеклалтше, ончаш толшын кумылжым нӧлталше, чон дене каналташ йӧрышӧ эше ик сай спектакль лектын.
У тургым у пашалан поян лийже, калык чыла спектакльыш зал тич погыныжо манын сугыньлена.