29 ноябрьыште Калык-влакын тӱвыра пӧртыштышт марий КВН команде-влакын фестивальышт лиеш. 18 шагатлан тӱҥалеш.
Тудо Ешын идалыкшылан пӧлеклалтеш да «2013-2030 ийлан Марий Элын кугыжаныш национальный политикыже» республикысе кугыжаныш программым илышыш шыҥдарыме кышкарыште эртаралтеш.
Организатор – Марий Элын Тӱвыра, савыктыш да калык-влакын пашашт шотышто министерствыжын полшымыж дене республикысе Марий тӱвыра рӱдер.
Фестивальыш Йошкар-Ола, Марий Элын районлаж гыч кеч-могай организацийын командыже ушнен кертеш. Кызытеш Йошкар-Ола гыч «10 КА» (капитан Игорь Попов) да «Кечан кече» (капитан Валентина Семенова) да Пошкырт кундем Мишкан села гыч «МММ» (капитан Алексей Ибулаев) команде-влак кумылым ончыктеныт.
Марий мыскара фестивальыш ушнаш шонышо-влак йодмашым 15 ноябрь марте рӱдерын mari-centr_konkurs@mail.ru электрон почтышкыжо колтышаш улыт. Чыла йодышым 8 (8362) 45-88-51 телефон дене рашемдаш лиеш.
Участник-влак кок конкурслан ончылгоч ямдылалтшаш улыт: иктыже – 5-7 минуташ визит картычке, весыже – «Муно чывым туныкта» мӧҥгысӧ паша, тыгак Ешын идалыкше дене кылдалтше кум йодыш гыч таҥасыше командылан ямдылышаш улыт.