8-14 сентябрьыште Грозный олаште Национальный театр-влакын V «Федераций» фестивальышт эртен. Тудым Россий Федерацийысе культур министерстве, РФ Театр-влак ушем да Чечня Республикысе культур министерстве эртарат. М.Шкетан лумеш Марий драме театр тений тушто кумшо гана участвоватлен. Ты гана У.Шекспирын «Укрощение строптивой» пьесыж почеш шындыме «Торешвате» комедийым намиен. Палемдыман, тенийсе фестиваль Еш идалыклан пӧлеклалтын.
Фестиваль жапыште Грозныйысо кум театр сценыште чылаже 13 спектакль ончыкталтын. Нунын коклаште чечня, башкир, татар, якут, авар, хакас, марий, адыгей, осетин, Оренбургысо руш театр лийыныт. Уна семын Мастерская «12» театр Никита Михалковын «12» спектакльжым репертуарыш пуртымо. Тыгак Никита Сергеевич дене шинчаваш ончен мутланымаш келге шарнымашым коден.
Мемнан театрын тӱҥ режиссержо Роман Алексеев фестиваль мучко тушто лийын, режиссер-влакын лабораторийыштышт пашам ыштен. Нуно кажне спектакльым онченыт да каҥашеныт.
М.Шкетан лӱмеш театр М.Лермонтов лӱмеш руш драмтеатрын сценыштыже модын. Тиде площадке артист-влаклан у огыл, тылеч ончычат тушко лектыныт. Но вес зрительлан да кугу кӱкшытан жюри ончылно модмо кажне гана тургыжланаш тарата.
Спектакль деч вара каҥашымаш лийын. Критик-влак шуко темлымашым ыштеныт, ой-каҥашым пуэныт. Фестивальыште участвоватлымын пайдаже лач тыштак. Мо ойлымым шотыш налын, тудо усталык шотышто кушкаш полша.