17 сентябрьыште «Кичиер» санаторий Марий тӱвыра рӱдер порылык кумылым ончыктышо концерт программе дене миен. Тыште посна сарзе операцийын участникше-влакын ешышт тазалыкыштым пеҥгыдемдат.
Тӱмыр, шӱвыр, гармонь, гитар почеш марий калык да эстраде муро-влакым «Сото вий» калык муро ансамбль, «Кас сем» вокал группо да мурызо-влак Эльвира Петрова, Светлана Яндукова, Лариса Сидоркина, Майя Ахметянова, Геннадий Григорьев, Геннадий Куклин да Анатолий Тимофеев йоҥгалтареныт. Актовый залыш погынышо-влак кажне выступленийым совым кырен вашлийыныт, ойгеш нелемше шӱм-чоныштым мыняр-гынат лыпландареныт.