«Ший талешке» шымлымаш конференций 24 апрельыште Калык тӱвыра пӧртыштӧ эртыш. Тудым Марий талешке кечылан да Ешын идалыкшылан пӧлеклалтын.
Марий тӱвыра рӱдер пеленысе «Падыраш» йоча фольклор ансамбль сылне муро дене пайрем кумылым луктын. Марий Элын тӱвыра, печать да калык-влакын пашашт шотышто министерствын пӧлкажым вуйлатыше Михаил Чемышев ден Марий тӱвыра рӱдерым вуйлатыше Василий Петров поро тыланымаш дене почыныт.
Кумылым савырыше, чоным вургыжтарыше паша-влакым тунемше ден туныктышо-влак ямдыленыт, сӧрал, уверлан поян презентацийым ыштеныт. Талешке-влак кызытат мемнан коклаште илат: элнам аралымаште пеҥгыдын шогат, калыкна верч тыршат, самырык-влаклан, кушкын шогышо тукымлан пример семын кодыт. Лач тиде темым «Кызытсе талешке мемнан коклаште» номинацийыште ойырымо ыле. Кокымшыжо Еш идалыклан пӧлеклалтше лийын: «Еш – мыйын эҥертышем» шымлымаш паша-влак туныктымаште, тӱвыраште, шанче, волонтер да моло пашаште сеҥымашыш шушо еш нерген сералтыныт. Чылаже 13 паша пурен.
«Кызытсе талешке мемнан коклаште» номинацийыште сеҥышыш И.С. Палантай лӱмеш тӱвыра да сымыктыш колледжын калыкле сымыктыш гимназийжын тунемшыже Мария Петухова да Морко районысо Эҥерсола тӱҥ школын тунемшыже Виктория Краснова лектыныт.
Кугурак ийготан-влак коклаште Волжский районысо Памар кыдалаш школын марий йылмым да ИКН-ым туныктышыжо Наталья Ивановна Яковлева ойыртемалтын. Сеҥыше-влак шке пашаштым посна сарзе операцийыште лийше да улшо родо-тукымыштлан, пошкудыштлан пӧлекленыт.
«Еш – мыйын эҥертышем» номинацийыште Ульяна Афанасьева ден Анна Васильева, Волжский районысо Памар кыдалаш школын тунемшыже-влак, сеҥыше радамыш улыт. Нуно Пӧртанур ялыште илыше 16 икшыван Владимир Александрович ден Наталья Леонидовна Васильевмыт еш нерген вашмутланымаш йӧным кучылтын каласкаленыт. Тений Российын Президентше Н.Л. Васильевам «Мать –героиня» чап лӱм дене палемден.
Йошкар-Оласе 14-ше номеран гимназийын тунемшыже-влак Эсмеральда ден Элеонора Александровамыт шуко шочшан ешыште йочан пиалже нерген шке шонымашыштым почын пуэныт. Советский районысо академик Л.А. Ожиганов лӱмеш Ӧрша тӱҥ школын кугыжаныш марий йылмым туныктышыжо Роза Геннадиевна Антропова почеламут корныла дене еш тукымвожшым почын ончыктен.
Кажне презентаторлан дипломым, сеҥыше-влаклан кубокым кучыктымо.
Раисия Николаева.