2 июньышто Калык тӱвыра пӧртышто «Пеледыш пайремлан ямдылалтме да тудым эртарыме шотышто методик да пашавиктыш йодыш-влак» тунемме-практик семинар эртен. Тушко районла гыч тӱвыра пӧлкан методик пӧлкам вуйлатыше ден тӱвыра пашаеҥ-влак лийыныт.
Тушто кажне площадкын пашаже нерген мутым лукмо. «Марий кудо» республикысе конкурсым эртарен колтымо да Тӱвыра да каныме рӱдӧ паркыште марий кудо-влакым вераҥдыме шотышто кугу мутланымаш лийын. Кажныже кудым кушан да кузе погаш – пален каеныт. Тидлан кугу полышым «Йошкар-Ола» оласе округын администрацийжын архитектур да градостроительство управленийым вуйлатыше Андрей Дождиков пуэн, парк кумдыкышто кудо-влакым вераҥдыме верым картыште палемден.
Семинарым Марий тӱвыра рӱдер эртарен.
Палемден кодыман, Пеледыш пайрем Йошкар-Олаште 17 июньышто лиеш.