Сотрудникам и ветеранам редакции журнала «Ончыко»

Пагалыме йолташ-влак!

Марий Эл Республикын Тӱвыра, савыктыш да калык-влакын пашашт шотышто министерстве да шке лӱмем дене «Ончыко» сылнымутан да мер-политик журналым 95 ияш юбилейже дене шокшын саламлем да марий калыкым сылнымут деке шӱмаҥдыме пеш кӱлешан пашаштыда кугу деч кугу сеҥымашым тыланем!

Эртыме корныштыжо журналлан шуко нелым, йӧсым, чыташ логалын, лӱмым икмыняр гана вашталташ верештын. Теве ынде 67 ий «Ончыко» лӱм дене лудшо-влак деке мия, илыш корно дене пеҥгыдын ошкылаш кумылаҥда. Тиде суапле корнышто эн поян да кӱлешан курал  — сылнымут лийын да ончыкыжымат лийын кодшашлан ме пеҥгыдын ӱшанена. Вет журнал лаштыклаште савыкталтше кажне произведений тӱвыргӧ пашашке ӱжын, мемнан чоннам эреак куандарен, у поро ошкылым ышташ кумылаҥден.

95 ий жапыште журналын лаштыклаштыже шагал огыл чапле произведений икымше лийын савыкталтын, лудшо-влак коклаште кугу мутланымашым, кугешнымашым, каҥашым тарватен. «Ончыко» журнал тынар пагытыште чынжымак самырык талант-влакым таптыше апшаткудыш савырнен. Тыге кугу сылнымутыш корным почшо савыктыш гоч кумдан палыме прозаик, поэт, драматург, публицист, шанчызе лектыныт. Нуно шочмо литератур аланым шке чапле деч  чапле произведенийышт дене пойдареныт, газет, радио, телевидений редакцийлашке пашаш пурен, памаш вӱд гай вий-куатым ешареныт. Тыге марий сылнымутна вияҥын, у шӱлышым налын.

Кызыт журнал сылнымут пашам гына вияҥдыше сомылым огыл шукта, тудо культур, экономике, социал илыш вашталт толмым ончыкташ, мер-политик илышнам почын пуаш кугу верым ойыра. Тыге республикысе виктер ончылно шогышо шуко шӧрынан задачым шуктымаште изи огыл полышым пуа.

Те кеч-куштат, кеч-кунамат шолын шогышо илыш йогынышто улыда, те палемдыме деч ӧрдыжеш огыда код, тыланда чыла теме оҥай. Тӱрлӧ кундемыште илыше марий калыкын ончыкылыкшо тендан дене чак кылдалтын. Тидланже министерстве лӱм дене поснак кугу таум каласыде огеш лий.

Марий кундемыште лекше,  савыктылтше произведенийда-влак дене чумыр марий тӱням авалтыше журнал коллективлан пеҥгыде тазалыкым, пиалым тыланем, чыла шонымашда тек шукталтеш. Ончыко гына!

 

Марий Эл Республикын Тӱвыра, савыктыш да калык-влакын пашашт шотышто министрже К.А. Иванов