Йочалан мурым пӧлеклынеда – конкурсыш ушныза

«Пӧлеклем йочалан мурым» – тыге маналтеш Марий тӱвыра рӱдерын эртарыме регион-влак кокласе сем (музыкальный) конкурсшо. Тудым июньышто увертарыме ыле. Кеҥеж жаплан конкурсым шуйымо. Паша-влакым 24 сентябрь марте колташ лиеш. Вашӱчаш 1 октябрьыште, Тӱнямбал музык кечын, иктешлалтеш.

Икшывым куштымаште, кап-кылжым да уш-акылым вияҥдымаште муро – ача-авалан кугу эҥертыш. Муро гоч йочан койыш-шоктышыжо вияҥеш, усталык памашыже почылтеш, илыш умылымашыже кушкеш. Куштылго йылме дене возымо, куштылго семан муро кажне йочан кумылжым нӧлталеш, лудаш, мураш кумылаҥда.

Усталык вашӱчашыш мурым да почеламутым возышо кажне еҥ ушнен кертеш: профессионал але любитель, туныктымо але тӱвыра сферыште тыршыше, композитор але бард семын кумдан палыме музыкант. Кажне участник кум муро марте колтен кертеш.

Автор-влакын пашашт эн изи ийготан йоча-влаклан, тыгак 3 гыч 10 ияш марте икшыве-влаклан возымо лийшаш. Мурын текстше вес авторын лийын кертеш. Тудо марий йылме дене серыме лийшаш.

Конкурсыш колтыман:

— текстым DOC форматыште,

— нотым SIB, TIF але PDF форматыште,

— аудиозаписьым MP3 форматыште, тыгодым 6 МБ деч кугу лийшаш огыл.

Мурын тематикыже тӱрлӧ лийын кертеш.

Палемден колыман, кызытсе жаплан кум автор деч конкурс паша пурен. Юлсер кундем гыч самодеятельный композитор Вячеслав Осипов, Марий Турек гыч Василий Васильев да Морко кундем гыч Сергей Николаев йочалан возымо мурыштым колтеныт.

«Пӧлеклем йочалан мурым» регион-влак кокласе конкурс умбакыже шуйна. Марий-влак илыме вес регион гычат мурым возышо-влак ушнат ӱшанен кодына. 24 сентябрь марте пашадам вучена.

Конкурсым иктешлымеке, муро да ното-влакым чумырен, электрон сборник савыкталтеш.

Раисия Николаева, Республикысе марий тӱвыра рӱдерын калык дене кылым ыштыше пӧлкам вуйлатыше