«Йоча Ӱярня» пайремыште тунемше-влак модыш дене палдарат

Марий Элыште калыкнан йӧратыме да жаплыме Ӱярня пайремже тений 8-ше ӱярняште пурен. Ий еда тудым республик мучко кумдан палемдат. Теният тудо тудо ятыр вере эртаралтеш.

Республикысе марий тӱвыра рӱдер пайремым «Йоча Ӱярня» конкурс сынан мероприятий дене почеш. Тудо Советский район Ӱшнӱр кыдалаш школышто эртаралтеш. Тудо марий йылме дене эрта, 10 шагатлан тӱҥалеш.

Тунемше-влак коклаште конкурс-влак тыгай номинаций дене эрташ тӱҥалыт:

– «Марий калык модыш» вашӱчашыште тунемше-влак калык модыш дене палдараш тӱҥалыт.

– «Ӱярня кува» пайремын символжым аклыме годым жюри еҥ-влак тудын марий пайремлан келшыше тӱжвал тӱсшым, пеҥгыдын шоген кертмыжым, тыгак Ӱярня кува нерген каласкален моштымым шотыш налыт.

– «Ӱярня такмак-влак» вашӱчаш эрта. Текст марий йылме дене возымо лийшаш.

«Марий йӱла» квест-модыш марий калыкын йӱлаже да пайремже-влак  нерген лиеш. Ребус, тушто, кроссворд да сканворд йӧн-влаклан эҥертен, йодыш-влакым ямдылыме.

Тошто марий пайремын ю виян шӱлышыжым йоча-влак уремыште тӱрлӧ марий модмаш гоч пален налыт.

Конкурслаште сеҥыше-влак диплом да шергакан приз дене палемдалтыт.

16-шо ӱярняште Йошкар-Олаште, Чарла Кремльыште, Марий да Руш тӱвыра рӱдер-влак Ӱярня пайремым эртарат.

Палемдыман, мероприятий-влакым эртарыме годым коронавирус инфекций шарлымым шекланыме шотышто санитар да гигиене мера-влак шукталташ тӱҥалыт.