Киров областьысе Малмыж велне ожнысекак шуко марий ила. Ты кундемын ик эн волгыдо шӱдыржӧ – Кугу Кетек ялын шочшыжо поэт Николай Тишин ыле. Тудо кодшо курымын 30-шо ийлаштыже элыштына эртыше кугу репрессий тул лоҥгаште «калык тушман» семын жап шуде илыш дене чеверласен. Вес палыме марий рвезе – 1981–1991 ийлаште партий Марий обкомын икымше секретарьжылан ыштыше Григорий Посибеев Марий Малмыж ялын шочшыжо ыле. Нунын шочмо калыкым пагалыме шӱлышым шыҥдарен кодымышт сай лектышым пуа – тусо марий-влак тӱп калык илыман кундем деч ӧрдыжтырак илат гынат, садак Йощкар-Олашке тӱвыра, сылнымут аланыште тыршыше-влак деке вўрышт шупшеш, нунын дене кылым пеҥгыдемдаш йєным муыт.
Март тӱҥалтыште Малмыж район гыч чолга ӱдырамаш-влак делегаций «Марий книга издательстве» савыктыш пӧртыш толын ыле. Рӱдӧ район библиотекын комплектаций пӧлкажым вуйлатыше самырык специалист Вероника Семёнова шочмо кундем, тусо тыршен, келшен илыше, тӱрлӧ йылме дене мутланыше пашаче еш дене палдарен, нунын деч кугу саламым каласен. Марий Малмыж ялысе 17-ше номеран библиотеке-филиалым вуйлатыше Римма Михайлова Григорий Посибеевын лӱмжым нумалше Марий культур рӱдерын пашаж нерген каласкален.
– Шочмо йылмына дене лекше сылнымутан литературлан чӱдылыкым кораҥдаш манме шонымаш дене тендан деке толынна. Таче теве кумыл нєлтын пӧртылына: ятыр марла книгам, «Ончыко», «У сем», «Кече-Солнышко» журнал-влакым налынна. Тау, тыланда, сылнымутчо йолташна-влак! – мане уна.
Кугу Кетек ялысе библиотеке районысо книгагудо-влак коклаште 7-ше номеран филиал семын палыме. Тудын вуйлатышыже Раисия Зайцева марий книга дене таҥлалташ кумылан-влак ешаралтме нерген ойлен, поро полышлан тауштен. Пытартышлан шушаш августын икымше шуматкечынже тыште эртараш палемдыме «Акпатыр пайремыш» мияш ӱжын.
Борис Редькин