25 февральыште Провой кундемысе Чакмарий школышто пайрем кас – тиде вершӧр нерген кумдан каласкалыше «Чакмарий» лӱман дене книга палдарымаш эртыш. Мотор мероприятийым чумыраш да эртарен колташ надырым «Мари ушем» мер организаций ден Республикысе марий тӱвыра рӱдерат пыштеныт.
Книган авторжо – Торгансола ялыште илыше, шке вершӧржым шымлаш кумылаҥше, тиде пашам йӧратен да моштен шуктен шогышо Михаил Михайлович Хорьков. Тудын нерген пайрем касыште шуко поро мут йоҥгалте. Нуным книган авторжо, ойлыманат огыл, чынже денак сулен – вет шочмо Чакмарий кундемже нерген шуко оҥай, кӱлешан материалым архивлаште, научный савыктышла гыч поген, нуным лончылен, иктешлен да сай руш йылме дене книгашке пуртен. Чыла тидыже «Чакмарий» лӱман книгам верысе калыклан чапле пӧлек семын ышта.
Книга дене палдарыме пайремыште район вуйлатыше, Йошкар-Ола гыч уна-влак, авторын – М.М. Хорьковын – землякше-влак лийыныт да ойленыт, сылне семым верысе артист-влак йоҥгалтареныт.
Марий тӱвыра рӱдер