Кечыгут Йошкар-Ола марла мутланыш

peledish_icon_0.jpgКодшо шуматкечын чумыр марий калык ал Пеледыш пайремым палемдыш. Арня жап шогышо йÿран игече, марий калыкын пайрем кумылжым шижын, мешанчык лияш ыш тошт. Ош марий тувырым чиен, чинче дене лойгыктен изижге-кугужге, тора корным ончыде, Марий Элын рӱдолашкыже ик эн йӧратыме пайремым палемдаш погыныш. Ал Пеледыш пайрем Пошкырт кундем Нефртекамск да Уфа ола гыч марий мер калыкым, Одо Республикын Сарапул ола гыч «Чолман йÿк», Татарстан Республик Кукмор район гыч «Кнавел», Киров областьысе Вятские Поляны олан «Пеледыш», Пермь кундем Суксун районын ансамбльжым, Свердловск область Арти район гыч «Ныжыл сем» фольклор ансамбль да Марий Эл Республикын кажне районжо гыч мурен-куштышо-влакым шке мастарлыкыштым ончыкташ чумырен. Пайрем Йошкар-Ола Пӱнчерысе тумеротышто Агавайрем кумалтыш дене тӱҥале. Тушко Республикысе карт-влак погынен толыныт. Нуно Агавайрем юмылан иктешлен вуйым савеныт. Марий калыклан перкем, тазалыкым йодыныт, шындыме шурно сай лектышым пуыжо манын кумалыныт. Ленин лӱмеш тӱвыра полат воктене Республикысе тӱвыра да сымыктыш колледжын уста коллективше да фольклор ансамбльже-влак «Ончылмуро» концертым ончыктеныт, «Пайремгорно» дене таҥ ошкылыныт. Район-влак шке сынже да койыш-шоктышыж дене ойыртемалтшын койыныт, мурен ошкылмышт дене оласе калыкын пайрем кумылжым нӧлтеныт. Пеледыш пайрем Ленин лӱмеш площадьыште кӱдаратлын почылто. Пайрем дене Леонид Игоревич Маркеловын, Марий Эл Республик главан, тыланыме шомакшым Правительство вуйлатышын алмаштышыже, тӱвыра, печать да калык-влакын пашашт шотышто министр Михаил Зиновьевич Васютин лудо, Марий Эл Республикын вияҥмашке кугу надырым пыштымыжлан Республикын тӱҥ онаеҥжылан, Александр Иванович Таныгинлан, «Марий Эл ончылно суплыкшылан» II степеньян орденым кучыктыш. Кугыжаныш Погын вуйлатышыже, Юрий Александрович Минаков марий йылме, тӱвыра да йӱлам вияҥдаш полшымылан: татар композитор Жаудат Гильмановым, «Марий сандалык» журналын редакторжо, Сергей Щегловым да гирьым нолтымӧ спортын спорт мастерже, Александр Замковым Кугыжаныш Погынын Почетан грамотше дене палемдыш. РФ Кугыжаныш Думын депутатше, Мер Каҥаш вуйлатыше Лариса Николаевна Яковлева чумыр марий калыкым Пеледыш пайрем дене саламлыш. Пушенге укшыш, варашке солыкым але тасмам кылдет гын, шонымашет шукталтеш маныт. Садланак вес ийысе Пеледыш пайрем марте порын, сайын, куанен, тыршен илаш, тачысе кечым шарнаш манын, кажне уна, тасма вакшыш тасмам кылдыш. Пеледыш пайрем кечын Марий Эл Республикына Кумда Россий покшелне кугу пеледыш аршашла лойген. Коло вич утла фольклор ансамбль тӱрлӧ пеледыш семын ик аршашышке ушнен. Марий семӱзгарын йоҥгыдо йӱкшӧ да ансамбль-влакын мур-сем поянлыкше марий калыкын чапшым кӱшнӧ кученыт. Марий Эл Республикысе кажне район пӧрт поянлыкше дене ойыртемалтеш. Пеледыш пайрем жапыште районласе кудышто мом гына ужаш пернен огыл: Килемар марий-влак ӱмбалым шӱшкын, ӱйым ыштеныт да погынышо калыклан ӧраным тамлен ончаш темленыт, марий тӱр, тутло йӱыш-кочкыш, шерге кумыл – чылажат ойыртемалтше марий тӱсан лийын. Виян да патыр марий эрге-влакым «Онар тукым» лӱман площадкыште чимарий кучедалмаш, кид кучедалмаш да пундышым нӧлтен таҥасымаш-влак вученыт. Чимарий кучедалмаште ятыр ий почыла 70 кг утла таҥасыше-влак коклаште Лебедев Евгений деч талыже лийын огыл, кокымшо вер дене Волжский район гыч Гаврилов Василий серлаген. 70 кг марте таҥасыше-влак коклаште 1 вер дене Огурцов Александр (Морко), 17 ияш самырык еҥ-влак коклаште Васинкин Олег (Морко) сеҥыше лийын. Гирьым нӧлтымаште 1 вер дене Гордеев Александр (Йошкар-Ола), 2 вер дене Веденеев Владимир (Морко) да кумшо вер дене Веселов Алексей (У Торъял) шергакан пӧлекым сеҥен налыныт. Пундышым нӧлтымаште 1 вер дене Гордеев Александр (Йошкар-Ола), 2 вер – Салтыков Вениамин (Медведево), 3 вер – Глушков Владимир (Параньга) сеҥыше лийыныт. Армсреслинг таҥасымашат сеҥыше-влакым палемдыме: 1 вер – Лукьянчиков Павел (Йошкар-Ола), 2 вер – Решетов Антон (Волжский), Хасиев Ала (Йошкар-Ола). Тиде жапыштак Колесо обозрений аттракцион воктене йоча-влаклан модыш программе эртен. А марла кушташ да мураш йӧратыше-влакым Марий касыште гармонь конкурсышто Юрий Кудрявцев, марий такмакым мурышо-влак коклаште Михаил Веселов (Параньга) шке мурпогыжо дене калыкым ӧрыктареныт. Пеледыш пайремым этнодискотек мучашлен. Марий тÿвыра рудер.

АКТУАЛЬНОЕ

Полезные ресурсы

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, Министерство культуры, печати и по делам национальностей Республики Марий Эл
424002, Йошкар-Ола, ул. Кремлёвская, д. 41, тел.: +7 (8362) 45-09-63,
Яндекс.Метрика