Шочмо йылмын тӱнямбал кечыже вашеш Марий тӱвыра рӱдер «Интернетыште да IT-ште марий йылмым кучылтмо шотышто лайфхак (пайдале каҥаш)» семинар-практикумым эртара. Тудо пургыж тылзын 19-ше кечынже В. Васильев лӱмеш Йылмым, сылнымутым да историйым шымлыше марий институтышто эрта. Мероприятий 10 шагатыште тӱҥалеш.
Семинарын участникше-влаклан марий клавиатур раскладкым кушто муаш, кузе тудым шындаш да кузе тудын дене пайдаланыме нерген каласкалаш да ончыкташ тӱҥалыт.
Марла чын возымашым LibreOffice ден онлайн-сервисын полшымышт дене тергаш лиеш. Но нунжым кушто муаш да нунын дене кузе пайдаланаш – семинарыште пален налаш лиеш.
Мероприятий жапыште тыгак электрон мутер дене пайдаланыме нерген практик занятий эртаралтеш.
«Telegram» мессенджерым рушла гыч марлаш кусарыме принципше нерген семинар-практикумышто мутланымаш лиеш.
Семинар-практикум студент, журналист, туныктышо, кугыжаныш кучемын пашаенже, тунемше да марий чонан кажне еҥлан пайдале лиеш.
Раисия Николаева, Марий тӱвыра рӱдерын калык дене кыл шотышто пӧлкам вуйлатыше