Элыштына 193 утла тӱрлӧ калык ила. Кажне калык шке йылмыж дене кугешна, да нунылан шке йылмышт дене мутланаш, илыш-йӱлаштым арален кодаш тырша. Марий Элна – 50 утла калыклан шӱмбел кундемже, а шочшышт да уныкашт-влаклан шочмо мландыже.
Нунылан шочмо йылмыштым, тӱвыраштым арален кодаш чыла йӧным ыштыме. Самырык тукым таче шке шочмо йылмыжым кузе пала, шке тукымвожшын чон поянлыкшым кузе аклен-саклен мошта – чын вашмутым «Мыйын шочмо йылмем» сочинений конкурс гоч муын кертына. Тыгай вашӱчашым Республикысе марий тӱвыра рӱдер Шочмо йылмын тӱнямбал кечыж вашеш эртара.
Конкурс кум тӱрлӧ ийготан-влак тӱшка-влак коклаште эртаралтеш. Икымше тӱшка – 13 гыч 16 ияш, кокымшо – 17 гыч 20 ияш, кумшо тӱшка – 21 гыч 35 ияш марте. Пашам Марий Эл Республикын кугыжаныш йылмышт (марий, тыгак курыкмарий да руш) дене возыман.
Пашан технический манме могыржым шергалына: Times New Roman (14 кегль) шрифт дене погымо лийшаш.
Паша-влакым 9 февраль марте mari-centr_konkurs@mail.ru электрон адрес дене колтыман. Йодышда лектеш гын, (8362) 45-88-51 телефон дене йыҥгыртыза.
Сеҥыше-влакым 18 пургыжышто «Lingva-Территорий» йылме фестивальыште саламлаш тӱҥалыт.
Марий тӱвыра рӱдер