Марий калыкын шӱшпыкшо чонышто ила

small_Logotip_Chketan.jpgУ Торъял район Тошто Торъялын шочшыжо, уста артистке, ший йӱкан шӱшпык гай мурызо Майя Романова ила гын, 23 мартыште 90 ийым тема ыле. Тудын шочмо кечынже, 14 шагатлан, артисткын илыме пӧртыштыжӧ (Волков урем, 166 №-ан пӧрт) шарнымаш оҥам почыт. Журналист, мурызо, артист-влакым да чыла кумылан-валкым пагален ӱжына.

26 мартыште 15.00 шагатлан М.Шкетан лӱмеш Марий кугыжаныш драме театрыште кугу концерт лиеш. Марий эстрадын чолга шӱдыржӧ-влак Зоя Берникова, Геннадий Петухов, Вячеслав Созонов, Светлана Строганова, Иван Смирнов, Роза Искакова, Александр Речкин, Эльвира Токташева, Вадим Краснов да молат шке сылне мураршашышт дене вашкат.

Тиде концертын ик ужашыже РСФСР-ын да Марий АССР-ын сулло артисткыже Майя Романовалан пӧлеклалтеш, тудын йоҥгалтарыме мурыж-влакым артист-влак мураш тӱҥалыт.

Татьяна Светлакова, М. Шкетан лӱмеш марий кугажаныш драме театрын сылнымут пӧлкажым вуйлатыше