Калыкле президент школышто «Самырык тукым» конкурс эртаралтеш

small_mari_ryder.jpgМарий Эл Республикысе йоча-влакын творчествыштым аклыше «Самырык тукым» конкурс кажне ийын эртаралтеш. Тений тудо Авалан пӧлеклалтеш да кок номинаций дене эрта: икымшыже «Авайнам саламлена!..», сценыште модын (театрализованный) саламлымаш, весыже – «Шыргыжал, авайна!..» саламлымашан открытке ончер.

Мероприятий кок тапыр дене эрташ тӱҥалеш. 20 март марте район кӱкшытыштӧ сеҥышым ойырат, а 22 март гыч районысо конкурсышто сеҥыше-влакым республик кӱкшытыштӧ аклаш тӱҥалыт. Тӱҥ мероприятий 29 мартыште Калыкле президент школышто 10 шагатлан лиеш.

Районышто сеҥыше йочан пашажым тыгай адрес дене кондыман: Йошкар-Ола, Первомайский урем, 109 №-ан пӧрт, Республикысе марий тӱвыра рӱдер. Тыгак mari-centr@mail.ru электрон почтыш, але (836) 2 45-88-51 факс дене колташ лиеш.

Мероприятийын организаторжылан Республикысе марий тӱвыра рӱдер, Марий Эл Республикысе Тӱвыра, печать да калык-влакын пашашт шотышто министерстве, Туныктыш да шанче министерстве шотлалтыт.

Республикысе марий тӱвыра рӱдер