«Марий сем-влак» татар йылме дене йоҥгат

small_kniga.JPGТатар поэт да кусарыше Рафис Курбанов марий поэт-влакын: Сергей Чавайнын, Николай Мухинын, Михаил Герасимов-Микайын, Никон Игнатьевын, Шабдар Осыпын, Яныш Ялкайнын, Илья Стрельниковын, Йыван Кырлян, Шадт Булатын, Василий Элмарын, Олык Ипайын, Анатолий Бикын, Анатолий Тимиркаевын, Геннадий Оярын, Чалай Васлийын, Семен Вишневскийын, Юрий Чавайнын, Альбертина Иванован - почеламутыштым шочмо йылмышкыже кусарен. «Марий сем-влак» ойпогым посна книга савыктыме.medium_sabanzev.jpg

Татар поэт тыгак Российысе да Казастанысе сылнымутчо-влакын ойпогыштым кусарен. Чылаже ныл книгам савыктен. Эртыше кечылаште Татарстанысе Калык келшымаш пӧртыштӧ книга-влакын презентацийышт эртен. Тушто Марий Эл Республикын калык поэтше Геннадий Ояр лийын да кусарыше Рафис Курбановлан марий сылнымутым тыге кумдан ончыктен пуымыжлан тауштен.

Рафис Курбанов мыняр-гынат марий тӱвырам пален, молан манаш гын тудын шочмо ялже Изи Битаман Юлсер кундемысе Усола Корамас ял деч икмыняр меҥге тораште верланен. Тунемме школжо Усола кыдалаш школ дене дене келшен илен, пырля спорт таҥасымашым, «Келшымаш тулотым» эртареныт.


Республиканский центр марийской культуры