Сценыште – 30 ий!

small_IvanSmirnov.jpg
Россий Федерацийын сулло, Марий Элын калык артистше Иван Смирнов 27 январьыште Шкетан лӱмеш Марий кугыжаныш драме театрыште кугу концертым эртара. Тенийсе усталык кас ойыртемалтше лиеш. Театр сымыктыш аланыште тудо 30 ий тырша.

Уста артистын илыш пӱрымашыже пӱтынек театр дене кылдалтын. Тыгодым ойыртемалт йоҥгалтше сылнысем аршашыже-влак дене марий калыкын кумылжым савырен. Шочмо-кушмо вершӧрын моторлыкшым, калыкнан шӱм-чон поянлыкшым, илышын тӱрлӧ шӧрынжым почын пуышо, йӧратымаш тӱня дене палдарыше Иван Смирновын йоҥгалтарыме муро-влак чонеш возыт, шонкалаш таратат да сылнылык тÿняш кумылаҥдат. Тудын усталык саскаже, марий сымыктыш аланышке пыштыме надырже кÿкшын аклалтын.

Концертыште калыкын йӧратыме артистше кумдан чапланыше да у муро-влакшым йоҥгалтара. Концерт программым пырля пашам ыштыше йолташыже да марий эстрадын шӱдыржӧ-влак сӧрастарат. Усталык кас 18 шагатлан тӱҥалеш.