Портышкем пайрем Карайыште

small_kugarnja_logo.jpgВолжск кундемысе Карай ялыште шочмо калыкнан илыш йӱлажым саклен илат. Ожнысек верысе калык усталык пашаже дене ойыртемалтеш. Кугыен-влак кидпашалан йоча-шамычым кумыландат. Лач тиде сай койыш-шоктыш ты кундемыште кажне ийын эртыше Портышкем пайремыште раш коеш. Тений тудо кумшо гана эрташ тӱҥалеш.

Портышкемым вес семынже ме межгем манына. Тудо ожнысек калыкын ик эн йӧратыме да эн кӱлешан йолчиемже. Илыш вашталтме дене портышкемым шагалрак чияш тӱҥалыныт ыле гын, пытартыш жапыште тудо уэш мемнан илышышкына пура. Кеч-могай йӱштӧ игече шогыжо, портышкемым чийыше еҥын йолжо огеш кылме. Межгем шокшо, пушкыдо да куштылго, моткоч пайдале. medium_valenki1.jpg

Йоча-влак йӧнан йолчиемыштлан пӧлеклалтше посна сӱрет ончерым, мастер-класс-влакым ямдылат. Палемден кодыман, ӧрдыж гыч толшо еҥлан тыге чучеш, пуйто ты школышто шинчымашым погышо кажне йоча сувенирлык портышкемым йӧрен мошта. Кажне тунемше тышке шке шӱм-шокшыжым пышта.

Сувенирлык портышкемым пӧлек шотеш кучыкташ моткоч лачеш толеш. Мужыр йолчиемыш иктышкыже оксам пыштат, весышкыже – шурно пырчым, да омса ӱмбак пыжыктат. Тудо суртышко пиалым кондышаш. medium_valenki4.jpg

Портышкемым йӧрымӧ паша куштылгыжак огыл. Шуко чытышым, жапым да вий-куатым налеш. Ожнысек межгем йӧрышӧ мастар-влакым акленыт да жапленыт. Тудо кундемыште ик эн пагалыме ен лийын. Чаманен каласаш логалеш, таче яллаште мастар еҥ шагал, кеч шокшо йолчиемлан йодмаш моткоч кугу гынат.

Портышкем пайрем жапыштак Теле ярмиҥга лиеш, тушто портышкемым да моло сатум налаш лиеш. Пайремыш толшо уна-влак тӱрлӧ таҥасымаште шке вий-куатыштым да мастарлыкыштым терген кертыт. medium_valenki2.jpg

Кугезе коча-кована-влак кеч-могай сомылым тӱшка вий дене ыштеныт, кидпашалан уста лийыныт, куаным ма ойгым лош пайленыт, кеч-могай пайремым пырля палемденыт, мурен-куштеныт, икоян лийыныт. Йӱлам сакленыт, пагаленыт, тӱвыра поянлыкнам араленыт. Ты койыш-шоктыш марий калыкын нигунам ынже йом.