Шорыкйол пайрем дене!

small_sorukuol1.jpgШорыкйол идалык мучко палемдалтше пайрем радамыште ик тӱҥ верым налын шога. Тудо тошто ийым иктешла да у ийым почеш. Шочмо калыкна ты пайрем дене шке ончыкылык пӱрымашыжлан ӱшаным шочыктен, озанлыкым вияҥден, ешын куатшым ешарен. Пайремын лӱмжӧ шорык йолым кучымо йӱла дене кылдалтын.

Поро йула почеш ынде икмыняр ий Республикысе марий тӱвыра рӱдер Шорыкйолым эртара. Тений рӱдерын пашаеҥже-влак пайремым Мари-Турек районысо Мари Купта ден Мари Китня ялысе калык дене палемденыт. Кажне кумылан еҥ весела модыш дене модын, мужедын, мурен-куштен.

Ялысе калык Шорыкйоллан, поснак пайремын икымше кечыжлан, кӱлеш семын ямдылалтын: мончам олтен, яндар вургемым чиен, мелна ден когыльым кӱэштын.

Тӱҥ йӱла-влак пайремын икымше кечынже шукталтыныт. Ожно кугезына-влак кокияш шурным ӱдымӧ нур ӱмбалне каван семын лум орам ыштеныт. Тыге нуно шушаш ийын тынарак каван кинде шурным тӱред налаш шоненыт. Садыштышт кушшо саскан пушеҥгын, вондын укшыжым рӱзалтен, оза-влак утларак емыж-саскам шочыкташ йодыныт. Шорыкйол годым еш кумалтышым эртареныт.

Кастене сурт еда Васли кува-кугыза дене пырля мӧчӧр-влак коштыныт. Нуно суртоза-влакым У ий дене саламленыт, еш пиалым, тазалыкым, шорык ешаралтмым сугыньленыт. Кугезына-влак нунын деч ончыкылык пӱрымашыштым умылаш тыршеныт, вет уна-влак мо лийшашым каласкален, порым гына сугыньлен ойленыт. Тыгодымак Васли кува-кугыза-шамыч суртышто ыштен толмо сомылыштым тергеныт.

Ожнысек марий калык шорыкым пеш пагала. Лач ты жапыште самырык ӱдыр-влак шорык йолым кучен мужедыныт. Шорык вӱташ пурен, вольык тулыжӧ манын, «Шорык йол, шочыкто», - ойленыт. Шорык межым пуа. Тудын дене носким, пижым пидыныт. Шорык коваште дене ужгам ургеныт. Шорык шыл - пеш пайдале кочкыш. Икманаш, пайрем ешын, озанлыкын ончыкылыкшо, суртышто вольыкын тӱланымыже дене кылдалтын.

Марий кечышот почеш, тений Шорыкйол пайремым шочмо калыкна 6 гыч 13 январь марте палемда.