Марий йоча-влаклан - марий У ий пайрем

small_IMG_5344.JPGРеспубликысе марий тӱвыра рӱдер кажне ийын йоча-влаклан У ий пайремым эрта. Тений «Чапле У ий пайремна» лӱман сылне программе дене пайрем Курчак театрыште эртен.

Тышке республикысе 10 район да Йошкар-Ола гыч 9-12 ияш 90 наре тунемше толын. Рӱдерын пашаеҥже-нлак нунынлан онай программым ямдыленыт. Йоча-влакым марий йомакласе герой-шамыч вашлийыныт, модыктеныт, мурыктеныт, куштыктеныт, тӱрлӧ таҥасымашым эртареныт. Йӱштӧ Кугыза ден Лумӱдыр тунемше-влакын шинчымашыштым тергеныт. Кӧ почеламутым лудын, кӧ мыскара мурым муралтен, весе куштымашыш лекташ ӱжын.

Палемдыман, организатор-влак тыгак икмыняр конкурсым увертареныт ыле: «У ий марий костюм», «У ий марий модыш» да «У ий открытке». Сеҥыше-влакым У йи пайремыште палемдыме. Тыге эн сай костюм Шернур район гыч Эвелина Егошинан лийын. Кокымшо вер дене Медведево поселко гыч Аня Никитина палемдалтын. Кумшо вер - Кужэҥер район гыч Сергей Ивановын.

"У ий открытке" номинацийыште I-ше вер дене Шернур район гыч Полина Овечкина палемдалтын, II-шо вер – Килемар поселко гыч Дарья Пуртован, III-шо вер – Советский район гыч Эльмира Усован.

Эн сай У ий модышым Медведево поселко гыч Сергей Крылов ыштен, II-шо верыште – Оршанке район гыч Софья Козлова, III-шо верыште – У Торъял район гыч Валерий Куклин.

Сеҥыше-влак Чап кагаз да шергакан пӧлек дене палемдалтыныт. Курчак театрын вуйлатышыже-влак дечат сай пӧлек лийын: спектакльыш билет да магнит. У ий пайремыш толшо кажне йоча Йӱштӧ кугыза деч шере пӧлекым налын.

medium_yii1.jpgmedium_yii2.jpgmedium_yii3.jpgmedium_yii4jpg.jpg